港島榮譽童軍會
港島榮譽童軍會 |
|
|
|
「暈完」船河、釣墨魚、歎海鮮團 |
| 羅子祐 |
活動通告話：
「各位有否試過在週末放假前的一個晚上，拋開繁瑣的日常事務，優閑地乘坐遊艇；在享受海上輕風之際，與其他會員淺呷著
醇厚紅酒，又或者大啖灌著清涼啤酒談天說地，再用大光燈釣墨魚，最後到著名海鮮酒家勝地「布袋澳」品嘗各款生猛美味海鮮？」亞媽教落不可盡信廣告，果然係嘅。 原來當晚現場情況是： |
| 二○○二年八月十六日星期五黃昏，二十多位會員﹝計埋屋企人同埋三位嘉賓﹞，瞞住老細匆匆收拾細軟放工、然後會合老婆仔女﹝噢！對不住，淨得仔，原來幾家人都無個女。﹞一齊趕到碼頭上船；以為今次無死，實行學人歎吓黃昏遊船河，兼見見移居加拿大多年的William
Chan 和Christina Lui。 好衰唔衰，當日下午忽然吹正東北風；於是各人全程在船上與風浪搏鬥，最勇猛莫如坐在船頭的RC Charles，搞到一褲都濕晒。千祈咪話我無事前特登寄出電郵俾每個參加者，提醒各人食定防暈浪丸。Stella Fung都算最聽話，到集合地點後，都要周圍藥房買丸；買番嘅12粒，結果俾人分晒淨番兩粒；最後發死人財吊高買，重話要3百蚊1粒添。Stephen老婆最唔聽話，明知唔掂都唔食定，結果白鶴兼餵魚。話說回來，好彩余志良贊助油渣錢的遊艇都有番咁上下size，否則…………..。 
各人紮實馬步之餘，爭取機會狂灌啤酒同埋掃清面麵包、蛋糕和龍眼﹝唔通驚住無嘔？﹞。好唔容易至挨到布袋澳對開海面，二話不說立即動員全船大人兼細路放下魚絲十幾條，希望當晚菜有著落。果然四十五分鐘時間內，由鄭定國和William
Chan兩人咁意各釣一條失魂墨魚而代表全船各人結束這個釣墨魚活動。晚上九時船泊碼頭上岸。只見周圍燈光火著，人影幢幢；非常熱鬧，好有鯉魚門feel。未坐落已經知到呢度布袋澳唔會浪得虛名，實有好食。發記海鮮酒家果然抵食，份量十足；一個食勻魚蝦蟹等生猛海鮮的套餐，都只不過$1,880。唔知點解，我交俾佢嗰兩隻墨魚煮出來都足足有兩大碟咁多嘅？ 飲飽食醉後，又是回程時間。正所謂：「大難臨頭各自飛」，Parkson兩公婆，Stephen 老婆和鄭定國寧願選擇坐綠van轉巴士再轉地鐵，都唔肯上船。其他各人一於死頂，乖乖落船。點不知今次得上天大老爺可憐，沿途出乎意外地順風順水，一路上無驚無險返到銅鑼灣避風塘碼頭解散。上到岸望望手表，時間好，凌晨12點。 |
|
會訊七期 返回主頁 |
Copyright
© 2002, Queen's Scout (HKI) and Queen's Guide
Club Web hosting sponsored by Alcornet Incorporation Last modified on December 5, 2002 |
